SABENCIA

 

SABENCIA: qué ye y quién somos

   La idea de facer un nomenclator xeneral de seres vivos n’asturianu foi l’aniciu de SABENCIA, qu’axuntó a delles presones de campos destremaos nun mesmu proyeutu.

   El trabayu multidisciplinar amosó la necesidá d’un conceyu de xente col enfotu de sopelexar les ciencies n’asturianu. Asina nació SABENCIA, na necesidá d’asoleyar el pruyir de la sociedá científica asturfalante. El nuesu finxu: estudiar y divulgar la ciencia n’asturianu.

   Garramos el nome SABENCIA, por ser la pallabra asturiana cola meyor podemos definir al grupu, que según el DALLA ye “aición y efeutu de saber o tener conocimientos”; amás damos-y un significáu más propiu al interés del grupu, al interpretala como l’acrónimu del SABER de la CIENCIA, tomando pa ello tolos aspeutos de la sociedá que se pueden estudiar col métodu científicu, un campu perampliu. Anguaño tenemos estayes abiertes en delles rames científiques: botánica, zooloxía, física, matemátiques, o etnografía (les estayes qu’apaecen nesta web), sicasí nun queda zarrada la llista, n’espera de nuevos miembros interesaos en nuevos campos.

   El nuesu logotipu ye la representación de la pintura rupestre del elefante de la Cueva’l Pindal, pues cuntamos que naquella persona que dibuxó les paredes caliares, biltaba l’aniciu del pensamientu científicu, que nun ye otru que retrucar les entrugues que toos nos ficimos daqué vegada: ¿cómo, qué y porqué?

 

ComparteEmail this to someoneShare on FacebookTweet about this on TwitterShare on Google+